الجمعات المليونية والميادين الثورية بقلم د / نجوى محمد سلام
بنحب مصر ؟
آآآآآآآآآآآآآآه وبنعشقها بقوة رغم كل السلبيات اللى عينينا ممكن تشوفها فيها
نضحى بروحنا عشانها ؟
طبعاً .......ما هية أم الدنيا الغالية على قلوبنا اللى مهما بعدنا عنها نرجع لها والشوق غلبنا .
ما بنحبش الفساد والظلم ليها وفيها ؟
أكيد ......وعلشان كده فقنا من نومنا الطويل وقدرنا نهزم خوفنا واتحولت الليالى السود نهار لما ملايين الأحبة لمصرنا
بنحلم بمصر جديدة حاضنة ولادها بجميع مستوياتهم وطبقاتهم الثقافية والإجتماعية والمهنية والعمرية والتعليمية وهلما جرا من التقسيمات اللى بلا معنى .
حلم جميل حلمناه كلنا أكيد فى يوم من الأيام ، وكان لازم ييجى اليوم اللى يتحول حلمنا فيه لحقيقة واضحة جلية قدام عيوننا ،مش مجرد حلم والسلام .
كل دى أنا معاكوا فيه ....... بقلبى وعقلى وروحى وكل نبضة فياّ ، وكنت ببقى سعيدة جداً والفرحة محوطانى من كل ناحية لما سى السيد يقوللى كل جمعة " يا الله بينا يا أمينة على الميدان " ، طبعاً زينا زى كتير بنطالب بالتغييير يعنى كنا بنروح الميدان مش فرجة وخلاص ولا تتضييع وقت ، كنت بقول فى عقلى مرة ولا اتنين نروح فيها الميدان نعبر عن رأينا نثبت للكل إن لنا صوت مسموع ، كل مرة يعوز سى السيد إننا نروح الميدان أقول " حاضر يا سى السيد " " وماله يا سى السيد " " اللى تشوفه يا سى السيد "
لأن كان فيه هدف بجد ، حلم حقيقى نفسنا يتحقق فى مصر جميلة ، مصر اللمة ودفء العيلة ، مصر محبة بين أطرافها قبطى ومسلم ، مصر الغنوة الحلوة اللى بتجمعنا فى وقت الحزن ووقت الفرح ، مصر اللقمة الواحدة على طبلية بسيطة فى عشة فى وقت عصارى ومحلى العيشا ، مصر بنات قمرات ماشيين فى امان اللى بشعر كلون الليل واللى بطرحة واللى ببيشة .
كنت سعيدة بيوم الجمعة وبستناه طول الأسبوع ،كنت فى بداية الثورة بستناه والفرح ملينى وبدعى المولى بعونه يعينى ويقوينى ع المشوار ، وأقول لازم يكون لنا دور فى الثورة لحد الحمد لله ما الثورة نجحت واتحقق حلم كل المصريين الملايين ، وجه رئيس جديد بفكر جديد وسياسة جديدة .
وقولت خلاص الحمد لله وصلنا لبر الأمان .........................
لكن الظاهر الحلم صبح كابوس بين يوم وليلة .
ليه ؟
هو دى السؤال اللى أغلب المصريين بيسألوه لبعض كل يوم ، ليه بننزل الميدان عمال على بطال بمعنى وبلا معنى ؟
ليه بقى هدفنا نزول الميدان وخلاص ؟ ليه بقى كل غايتنا قولت لا والسلام ؟
لالالالالالالالالالالالالا
على أى حاجة وكل حاجة ، ناقص إن الواحد مننا لما يحس بشوية صداع يجرى ع الميدان يعترض ويصرخ ليه يا صداع وجعتلى دماغى ؟
بالذمة يا صحاب العقول دى اسمه كلام
بنحب مصربس لازم نتعلم نحبها صح إزاى ؟
" يا سى السيد " يا أبو الحكمة فين الحكمة راحت فين ؟
كل يومين والتانى نازلى ع الميدان - حاجة سخيفة – مرة عشان رواتبنا قليلة ماشى يا سيدى معاك بنطالب بعدالة إجتماعية نزيهة ولقمة عيش بكرامة ناكلها ووظيفة مناسبة لعيالنا ، حقك تاخده ماقولناش حاجة بس العيب نصبح شبيحة ومصر بلدنا الغالية علينا تصبح فى عيون كل الدنيا صورة مطموسة بزعيق وفضيحة ، قوم اتفرج ميت فضائية بتجرح فينا ، والنتيتة اتلموا علينا وبقت حكاويهم بغلاسة عن مشاكلنا ويا بلدنا واتهاماتنا لبعض صريحة .
لا يا سعادة البيه أنا رافضة كلامك وحوارك وميدانك وكارهة الثورة بفلسفة مرة مدامت منك ، أيوة عشانك ،علشان مش فاهم مبادئها ، ثورتى مش معناها همجية ثورتى يوم ما ناديت أنا بيها كانت حرية بحلم بيها لمصر أبية مش مصر المجروحة بدمى ودم ولادى .
فوق أرجوك أنت وتواءمك أنت وأشباهك وافهموا صح معنى الميادين الثورية .
